الحلم
الحلم .. جواك ابتدا ..... يلعن فى اوجاعك دواه
الحلم صوت بيرددك .. لحظة ما بيردد صداه
الحلم موت ... وبينتهى في الحلم موت
لحظة ولادة الف الف من الامل
أنا مهما موّتنى الخجل
بردك هعيد للحلم دقّات الحياه
. .
أنا حلم بيصارع خطاه
لحظة مرور المستحيل
أنا نبض تاه
عاشق في ضعف الناس مداه
انا شوق غريق
انا بحر صمت جرفنى موجه لمنتهاه
وسط الطريق
انا شوق محال
أنا نبرة الصوت العليل
لحظة مابيموت الخيال
أنا شوك فى ضهر الاحتمال
لأ ... مش كده
أنا حلم عاشق للقلوب الطيبة
لأ .. مش كده
أنا دمعة صعبة قريّبه
لأ .. مش كده
أنا قصدي
لمّا بيبتدي في الحلم خوف
بيتوه حروف كل اللى كان نفسي اكتبه:
انا حلم بيدور المدار
جواه ضمير بيأنبه
جواه سكون
أنا شوق بيعشقنى الجنون
أنا مهما أكون
بردك أسير الامنية
لأ .. مش كده
أنا قصدي غير كل اللى فات
أنا حلم مات
م الضحك يمكن
بردو يمكن م السكات
وبيتولد مع كل موتة حلم .. حلم
بيصارع القلب اللى مليه الجروح
وبرمي حمله على الطموح
وبيتولد مع كل موتة حلم
حلم
رافض يموت ......
رافض يخبيه السكات .......
وبيتولد مع رجفة الخوف والممات
احساس عنيد
بيصارع القلب اللى ملياه الجروح
وبيرمى اوجاع السنين
على كل الوان الطموح
ويتـــوه مع نبض الوريد
وبيجبر الخوف اللى ساكن ضلمته
يحلم .. يكون فى العمر قلب
يحلم .. يكون فى القلب حلم
يحلم.. يكون فى الحلم نبض جديد
وبس
**********
أحمد البوهي
ليست هناك تعليقات:
إرسال تعليق